Heidi Bjørnsdotter Thorvik

Eg vaks opp i ei lita bygd i Ryfylke på Vestlandet. Med sterk kjærleik til naturen, tradisjonshandverk, og ei farmor som kunne kunsten å lage gull av gråstein. Mi utdanning starta der med dyktige, kreative og nøysame handverkarar. Sidan 1994 har eg budd og arbeida i Oslo som faglærar i kunst og handverk og med mitt eige skapande virke. Eg tek gjerne utgangspunkt i eit rått eller godt brukt naturmaterial, gamle teknikkar eller reiskapar. Det er ekstra spennande å utforske og snu litt opp ned på det som frå gammalt av var typisk kvinnelege teknikkar. Slike som ikkje alltid har hatt like høg verdi. I 2005 oppretta eg mitt eige virke under namnet VØLT. Eit ord frå min dialekt som kjem frå norrønt og betyr å sette i stand eller reparere. Dette er framleis ein sterk påminnar om kva som ligg til grunn for mitt arbeid: Ta vare på å utnytte material på best mogleg måte, og med tanken om at me kan hende må tilbake for å finne vegen fram. Portrett foto: Espen Grønli